硬膠中環

匯膠銀行

2008-04-19T01:04:00.000-07:00

作為一個同時穿梭英、港、美三地嘅人，用HSBC本來係好自己嘅選擇，無他，HSBC在三地嘅網絡都不錯，用起嚟比較方便。

不過，匯膠銀行膠力越嚟越犀利，真係火都嚟。

小弟有部分人工係用英鎊發嘅，轉賬到香港嘅英鎊戶口，我再自己按需要轉賬一啲錢過港幣戶口。不過，匯豐班膠人，突然間話「戶口使用狀況」問題，唔俾我將份糧由英鎊戶口轉到港紙戶口。

我人喺英國，匯豐班膠人同我講，禮拜一返香港分行做咪得。

你班黐線人架，隨便唔俾人用自助戶口服務，侷人去分行，班友有病呀。唔怪得我嘅朋友，好多寧願唔用匯膠銀行。

邊條膠人提出繁忙時間去綵排聖火

2008-04-17T10:32:00.000-07:00

我作為一個只識搵銀嘅膠人，係唔理政治，西藏獨立定被人吞咗，關我叉事。

不過，今日返到酒店果陣，電視機有message，話明天晏晝三點至五點，會喺灣仔、金鐘、中環搞傳聖綵排，要封路，預料會塞到阿媽都唔認得。

邊條膠人提出繁忙時間搞呢啲硬膠綵排，果陣有幾多人喺中環活動，仲可能搞到周末Happy嘅schedule調到亂晒。支持呢個建議嘅膠人，我建議應該拖佢去北京槍斃。

火滾起嚟，真係我都去搶聖火算，傳乜叉聖火，真係奧你媽的運。

一樣有膠力的Y5Zone

2008-04-15T05:24:00.000-07:00

上鋪講過PCCW WiFi有幾膠，呢鋪要講吓Y5Zone有幾膠，由班唔識做街客嘅茂利做WiFi，想賺錢真係幾有難度。

PCCW話係膠都好，但至少見七仔可以買到WiFi pre-paid card，而且PCCW嘅Credit Card Payment Gateway都唔膠。但Y5Zone就連星巴克都唔知邊度有卡賣。最膠係，Y5Zone嘅網上Credit Card Payment Gateway，對有一啲信用咭係唔兼容，成日都話俾唔到錢，外國遊客仲唔俾你激起火都起。

其他嘅硬膠WiFi公司，好似ST Telecom就更等而下之。但Y5Zone如果唔改善，睇落要有運行都有一段日子。

有膠力的PCCW Wifi

2008-04-14T11:39:00.000-07:00

返嚟香港，用得比較多除咗Smartone個HSDPA網絡，仲有PCCW WiFi。

PCCW Wifi查實唔係太差，至少未到膠爆級。可惜對iPhone人嚟講，PCCW WiFi好叉麻煩。因為PCCW WiFi每個Hotspot嘅覆蓋好有限，與此同時，iPhone又係揸住周圍走，結果成日要走去Safari度Reconnect，用有內置WiFi嘅Blackberry，都係除咗飲緊咖啡時至有著數，否則都好麻煩。

我依家查實用緊PCCW Mobile個台，李澤楷唔知有無察覺自己公司嘅服務有膠力，最多SIM Card與WiFi認證結合，咁會唔會方便啲啲。無理由吓吓要買華為果個膠爆HSDPA、WiFi多合一嘅膠嘢㗎。

膠到無朋友的皇室堡Pacific Coffee

2008-04-12T01:23:00.000-07:00

我有時都覺得自己有啲犯賤，竟然返到嚟香港，又幫襯Pacific Coffee，結果就谷氣到飛起。

今日返到嚟香港，喺皇室堡的Pacific Coffee等人，咁朋友遲到，我又想等到朋友齊人至買嘢飲，咪玩住我部Macbook先。點知有位著住黑衫，叫Raymond嘅經理，非常唔客氣咁，不斷要我買嘢飲，我覺得呢種係乜服務態度嚟，我就等齊朋友。

之後Raymond越嚟越得寸進尺，我就決定當眾喺佢面對入Pacific Coffee網頁，打投訴信，條友厚顏到由後面睇我打乜，之後條友用好差的表情不斷響我左右行動，我就用我嘅iPhone發SMS俾朋友改地點，然後鬧爆成間Pacific Coffee嘅staff揚長而去。

呢啲係乜服務態度嚟，我俾三十蚊買杯咖啡飲啲咁嘅服務態度？你估我會唔會？當我傻㗎。講句真，英資嘅Starbuck贏佢幾條街，原因好清楚。

Smartone的古怪預付卡業務

2008-01-12T22:16:00.000-08:00

近排喺香港公幹，為咗節省電話費，但又唔想出台（點出台，成日飛，住酒店多過住屋企），買咗張儲值卡。喺公司附近發現有街霸推廣數碼通（0315.HK）嘅儲值卡，睇落通話費又好抵，咁買咗張嚟用。

咁用用吓，當然會無晒錢，喺網上增值嘅密碼又唔記得咗，咁就打算落街買，喺某日嘅深宵時份，響西環我住嘅酒店附近，就周圍搵增值券嚟買。

但結果真係膠到無朋友，便利店間間都有得賣，就係無數碼通，連有e票聯嘅網吧、機鋪，都無數碼通嘅增值券賣嘅，而有得賣嘅報攤，喺深夜時分梗係關咗門，最後我放棄，我買咗張PCCW嘅頂檔算數，好過俾香港嘅硬膠酒店劏你本地電話$4一個call。

你又請人promote你張預付卡，但增值券嘅銷售網又差成咁，究竟你數碼通班管理層想點，佢地嘅硬膠管理真係令股民好不安。

膠到無朋友之Perfect Cup Card

2008-01-11T06:55:00.000-08:00

有啲公司，一俾縮骨嘅香港人買咗，就會膠到無朋友。Pacific Coffee可算係當中嘅表表者。

近排Pacific Coffee取消咗好唔方便嘅蓋印卡，改為用一張叫The Perfect Cup Card嘅磁卡取代。本來呢個idea係幾唔錯。不過當我呢個膠人正打算申請張果陣發現，原來你先要買咗張HKD 200嘅Gift Card，至可以參加呢個新Program。即係你要優惠，先未見官先打一百大板。

你估我會唔會買張咭，梗係唔會喇。如果你其士真係最關注果杯免費咖啡嘅Cost，不如入八達通日日賞無咁嬲，或者每張卡要俾番廿蚊至五十蚊成本費，然後喺咖啡裡面回贈。HKD 200 Gift Card，我真係唔知啲香港老板個腦用乜做。

Pacific Coffee以前唔係咁膠，俾其士（0025.HK）喺2006年完成收購咗，就膠力越嚟越勁。香港人果啲商家佬仲係成日諗縮數，點同嚟自美國，有英資撐腰嘅香港Starbuck鬥，真係一個謎。

點解寫呢個blog

2008-01-09T08:44:00.000-08:00

各位你地好，歡迎你地嚟度硬膠中環。

大家成日實以為，中環果班西裝友，喺大公司做一定好掂。但香港好多公司，由管理到營運都係一舊膠，仲要係無朋友果隻。鋪鋪返到嚟香港，用埋一堆膠服務都成肚火，所以，我決定寫硬膠中環呢個blog，平衡一下自己嘅心理。

歡迎果啲大公司高層嚟照吓鏡，不過如果搞到心臟病發作死鬼咗，唔好搵我負責。